ພິທີເປີດການນຳສົ່ງເຂົ້າລາວ ຈາກໂຮງສີເຂົ້າທີ່ໄດ້ມາດຕະຖານ GMP ໄປຈໍາໜ່າຍຢູ່ທີ່ ອາເມຣິກາ ໄດ້ຈັດຂຶ້ນໃນວັນທີ 23 ທັນວາ 2024 ຢູ່ທີ່ໂຮງສີເຂົ້າ ວານິດາ ບ້ານເລົ່າໂພຄໍາ ເມືອງທ່າແຂກ ແຂວງຄຳມ່ວນ ໂດຍການເປັນກຽດເຂົ້າຮ່ວມຂອງທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ, ທ່ານ ແກ້ວວິໄລ ໄຊຍະບຸດ ເຈົ້າເມືອງທ່າແຂກ, ພ້ອມດ້ວຍພະແນກການ, ຂະແໜງການກ່ຽວຂ້ອງເຂົ້າຮ່ວມ.
ທ່ານ ເພັດສະໝອນ ບົວພັນທະວົງ ຜູ້ອຳນວຍການ ບໍລິສັດ ວານິດາ ການຄ້າຈຳກັດ ຜູ້ດຽວ ໄດ້ລາຍງານໃນການສ້າງຕັ້ງ ແລະ ເປົ້າໝາຍການດຳເນີນກິດຈະການໂຮງສີເຂົ້າວ່າ: ໂຮງສີເຂົ້າ ວານິດາ ສ້າງຕັ້ງຂຶ້ນໃນປີ 1993 ມີຈຸດປະສົງໃນເບື້ອງຕົ້ນ ເພື່ອເກັບຊື້ເຂົ້າເປືອກ ແລະແປຮູບເຂົ້າສະໜອງພາຍໃນປະເທດ, ໃນປີ 2009 ໄດ້ເຂົ້າຮ່ວມໂຄງການຜະລິດເຂົ້າເປັນສິນຄ້າ ເພື່ອປັບປຸງເຂົ້າລາວ ໃຫ້ໄດ້ມາດຕະຖານການສົ່ງອອກ ພ້ອມທັງໄດ້ສ້າງຕັ້ງກຸ່ມປູກເຂົ້າເປັນສິນຄ້າ ປະກອບມີ 15 ກຸ່ມໃນ 04 ເມືອງຄື: ທ່າແຂກ, ໜອງບົກ, ເຊບັ້ງໄຟ ແຂວງຄຳມ່ວນ ແລະ ເມືອງໄຊບູລີ ແຂວງສະຫວັນນະເຂດ, ມີຈໍານວນ 1,380 ຄອບຄົວ ແລະ ມີເນື້ອທີ່ລວມທັງໝົດ 2,812 ເຮັກຕາ ໃນນີ້ທາງໂຮງສີແມ່ນໄດ້ມີການສົ່ງເສີມ ການຝຶກອົບຮົມໃນການປູກເຂົ້າ, ສະໜອງທາງດ້ານແນວພັນ, ຝຸ່ນ, ປຸ໋ຍ ແລະ ສົ່ງເສີມທາງດ້ານການບົວລະບັດຮັກສາ ພ້ອມທັງເກັບຊື້ເຂົ້າເປືອກຈາກກຸ່ມຜູ້ຜະລິດເຂົ້າ, ໃນປີ 2012 ກໍ່ໄດ້ທົດລອງສົ່ງເຂົ້າອອກໄປຈໍາໜ່າຍຢູ່ທີ່ປະເທດໄທ ຈຳນວນ 250 ໂຕ່ນ ຈາກນັ້ນຈຶ່ງມີຄວາມຄິດລິເລີ່ມຢາກສ້າງມາດຕະຖານໂຮງສີທີ່ໄດ້ຄຸນນະພາບ ເພື່ອສ້າງເງື່ອນໄຂໃນການສົ່ງເຂົ້າອອກໄປຈໍາໜ່າຍຢູ່ທາງກຸ່ມປະເທດເອີຣົບ ແລະ ໃນປີ 2017 ໂຮງສີເຂົ້າ ວານິດາ ກໍ່ໄດ້ຮັບການຢັ້ງຢືນມາດຕະຖານ GMP ພ້ອມທັງໄດ້ເລີ່ມນໍາສົ່ງເຂົ້າຈ້າວ ຈຳນວນ 190 ໂຕ່ນ ໄປຈຳໜ່າຍຢູ່ປະເທດ ເນເທີແລນ ແລະ ສົ່ງເຂົ້າໜຽວ ຈໍານວນ 23 ໂຕນ ໄປປະເທດເບວຢ້ຽມ, ມາຮອດປີ 2023 ໄດ້ມີລູກຄ້າ ຈາກອາເມຣິກາ ມາສັ່ງຊື້ເຂົ້າ ແລະ ໄດ້ຈັດສົ່ງໄປງວດທຳອິດໃນເດືອນກຸມພາ 2024 ຈໍານວນ 18 ໂຕນ ແລະ ງວດທີ 2 ແມ່ນໄດ້ຈັດສົ່ງໄປໃນວັນທີ 23 ທັນວາ ປີ 2024 ຈຳນວນ 20 ກວ່າໂຕນ ແລະ ໃນປີ 2025 ນີ້ ທາງໂຮງສີກໍ່ໄດ້ເຊັນສັນຍາໃນການສົ່ງເຂົ້າຈໍານວນ 1,000 ໂຕນ ໄປປະເທດເບວຢ້ຽມ ໂດຍຈະໄດ້ເລີ່ມສົ່ງອອກໃນເດືອນກຸມພາ ເປັນຕົ້ນໄປ.
ໃນໂອກາດເຂົ້າຮ່ວມພິທີຄັ້ງນີ້ ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ ກໍ່ໄດ້ມີຄໍາເຫັນສະເໜີໃຫ້ທາງໂຮງສີເຂົ້າ ໄດ້ມີການສົ່ງເສີມຜູ້ຜະລິດໃຫ້ມີຄວາມເຂັ້ມແຂງ ພ້ອມທັງມີການຜູກພັນສັນຍາກັບເຂົາເຈົ້າ ເພື່ອໃຫ້ສາມາດເພີ່ມປະລິມານການຜະລິດສະໜອງວັດຖຸດິບໃຫ້ແກ່ໂຮງສີ, ພ້ອມນັ້ນກໍ່ຕ້ອງມີການຍົກລະດັບໂຮງສີ ເພື່ອເພີ່ມກຳລັງການຜະລິດ, ປັບປຸງຄຸນນະພາບໃຫ້ດີຂຶ້ນ ຕິດພັນກັບການຂະຫຍາຍຕະຫຼາດໃຫ້ກວ້າງອອກຕື່ມ, ມອບໃຫ້ຂະແໜງການທີ່ກ່ຽວຂ້ອງທາງພາກລັດ, ພາກທະນາຄານທຸລະກິດອຳນວຍຄວາມສະດວກໃນການສ້າງເງື່ອນໄຂໃນການສົ່ງອອກ, ການຊອກຫາຕະຫຼາດທີ່ມີຄວາມຫຼາກຫຼາຍລວມເຖິງການເຂົ້າເຖິງແຫຼ່ງທຶນເພື່ອມາຕໍ່ຍອດກິດຈະການໃຫ້ດຳເນີນຕໍ່ໄປ ແລະ ພັດທະນາທຸລະກິດໃຫ້ມີຄວາມເຂັ້ມແຂງ ໃຫ້ສາມາດແກ້ງແຍ້ງແຂ່ງຂັນກັບຕະຫຼາດໂລກໄດ້ໃນອະນາຄົດ.
ທີ່ມາ: ຂ່າວເສດຖະກິດ-ສັງຄົມ : https://www.facebook.com/photo?fbid=1007520448078875&set=a.598450565652534
