ຂປລ. ພິທີເປີດນຳໃຊ້ ຫໍພິພິທະພັນ ສິລະປະລາວ ຈັດຂຶ້ນໃນວັນທີ 6 ມັງກອນ 2025 ຢູ່ບ້ານໂນນສະອາດ ເມືອງໄຊທານີ ນະຄອນຫລວງວຽງຈັນ ໂດຍມີ ທ່ານ ສອນໄຊ ສິພັນດອນ ນາຍົກລັດຖະ ມົນຕີແຫ່ງ ສປປ ລາວ, ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫລວງວຽງຈັນ, ທ່ານ ນາງ ສວນສະຫວັນ ວິຍະເກດ ລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ພິຊິດ ໄຊຍະທິດ ຜູ້ກໍ່ຕັ້ງ ແລະ ປະທານ ຫໍພິພິທະພັນ ສິລະປະລາວ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ມີຄໍາເຫັນວ່າ: ການເປີດ ພິພິທະພັນ ສິລະປະລາວ ຄັ້ງນີ້, ບໍ່ເປັນພຽງການເປີດສະຖານທີ່ທ່ອງທ່ຽວແຫ່ງໃໝ່ເທົ່ານັ້ນ ແຕ່ຍັງເປັນການສົ່ງເສີມບົດ ບາດຄວາມສຳຄັນຂອງປະເທດ ທາງດ້ານເສດຖະກິດ-ສັງຄົມ ແລະ ເປີດປະຕູສູ່ອະນາຄົດທີ່ສົດໃສຂອງ ສິລະປະວັດທະນະທຳລາວ. ພິພິທະພັນແຫ່ງນີ້, ຈະເປັນສູນກາງເສດຖະກິດໃນຮູບແບບການທ່ອງທ່ຽວ ທາງວັດທະນະທຳ ເຊິ່ງຈະຊ່ວຍສ້າງວຽກເຮັດງານທຳ, ສ້າງລາຍໄດ້ໃຫ້ກັບປະຊາຊົນໃນທ່ອງຖິ່ນ ແລະ ກະຕຸ້ນໃຫ້ມີການລົງທຶນໃໝ່ ໃນພາກບໍລິການ ແລະ ການທ່ອງທ່ຽວ, ພິພິທະພັນແຫ່ງນີ້ ເປັນສັນຍາລັກ ແຫ່ງຄວາມຫວັງ ຄວາມມີສີໄມ້ລາຍມື ແລະ ຄວາມຮູ້ຄວາມສາມາດຂອງຄົນລາວ ເຊິ່ງເປັນສິ່ງຢັ້ງຢືນວ່າ ສິລະປະລາວ ສາມາດປະກົດຕົວ ແລະ ຄົງຕົວໃນເວທີໂລກໄດ້ຢ່າງພາກພູມໃຈ.

ພ້ອມນີ້, ທ່ານ ພິຊິດ ໄຊຍະທິດ ໄດ້ໃຫ້ຮູ້ວ່າ: ຫໍພິພິທະພັນ ສິລະປະລາວ ແຫ່ງນີ້, ຖືວ່າແມ່ນຜົນງານການຜັນຂະຫຍາຍແນວ ທາງນະໂຍບາຍອັນຖືກຕ້ອງສ່ອງໃສຂອງ ພັກ-ລັດ, ຫໍພິພິທະພັນແຫ່ງນີ້ ບໍ່ເປັນພຽງສະຖານທີ່ວາງສະແດງຜົນງານສິລະປະກຳເທົ່ານັ້ນ, ແຕ່ມັນຍັງເປັນການສະແດງໃຫ້ເຫັນເຖິງຄວາມຫລັງໄຫລໃນວັດທະນາທຳ, ສິລະປະອັນງົດງາມຂອງຊາວລາວ, ທັງສະແດງອອກເຖິງຄວາມມຸ່ງມານະ, ຄວາມພາກພຽນພະຍາຍາມຢ່າງບໍ່ຮູ້ອິດເມື່ອຍ ໃນການປະດິດສ້າງດ້ວຍຈິດວິນຍານ ອັນສວຍງາມ ແລະ ມີຄຸນຄ່າທາງສິລະປະຂອງລາວ, ມັນສະແດງອອກເຖິງສັກສີທາງວັດທະນະທຳ. ສິລະປະກຳ ໂດຍສະເພາະການແກະສະຫລັກໄມ້ ແມ່ນຮາກຖານສໍາຄັນໜຶ່ງຂອງວັດທະນະທໍາລາວເຮົາ, ມັນໄດ້ສະທ້ອນໃຫ້ເຫັນເຖິງຄວາມງົດງາມ, ຝີມືອັນປະນີດ ລະອຽດອ່ອນ, ຄວາມສະຫລັບສັບຊ້ອນທາງວິຈິດສິນທີ່ແຝງໄປດ້ວຍຄວາມໝາຍອັນເລິກເຊິ່ງ ໄດ້ບັນຍາຍເຖິງວິຖີຊີວິດ, ຄວາມສັດທາ, ຄວາມຝັນ, ຄວາມມຸ່ງມາດປາຖະໜາຂອງຊາວລາວ ແລະ ຄວາມງົດງາມດັ່ງກ່າວນັ້ນ ໄດ້ຖືກຖ່າຍທອດ ໃຫ້ເປັນຜົນ ງານ ທີ່ສາມາດສຳຜັດ ແລະຈັບຕ້ອງໄດ້ ນະທີ່ ຫໍພິພິທະພັນ ແຫ່ງນີ້.

ທ່ານ ພິຊິດ ໄຊຍະທິດ ກ່າວຕື່ມອີກວ່າ: ຫໍພິພິທະພັນ ສິລະປະລາວ ແຫ່ງນີ້, ຈະກາຍເປັນ ແຫລ່ງເສີມສ້າງວັດທະນະທຳທີ່ສໍາຄັນ ເຊິ່ງຈະຊ່ວຍອະນຸລັກ ແລະ ສົ່ງເສີມມໍລະດົກ ດ້ານສິລະປະຂອງລາວ, ພ້ອມທັງ ເປີດໂອກາດໃຫ້ ນັກສິລະປະກອນ ໃນທ້ອງຖິ່ນ ໄດ້ມີໂອກາດສະແດງຜົນງານຂອງເຂົາເຈົ້າ; ຫໍພິພິທະພັນນີ້ ຈະກາຍເປັນ ແມ່ເຫລັກດຶງດູດນັກທ່ອງທ່ຽວ, ສ້າງລາຍໄດ້ໃຫ້ກັບທຸລະກິດໃນພື້ນທີ່ ແລະ ສ້າງວຽກເຮັດງານທໍາ ໃຫ້ຫລາຍພາກສ່ວນ ເຊັ່ນ: ການບໍລິການ, ການຄ້າຂາຍຍ່ອຍ, ງານສິລະປະກຳ ແລະ ຜູ້ປະກອບການອື່ນໆ ສາມາດສ້າງວຽກເຮັດງານທຳ ແລະ ມີລາຍຮັບ. ສໍາລັບ ພິພິທະພັນເອງ ກໍຈະສ້າງວຽກເຮັດງານທໍາແບບໂດຍກົງ ໄດ້ 300-400 ຄົນ.
ພິພິທະພັນ ສິລະປະລາວ, ປະກອບມີອາຄານນໍາສະເໜີຂໍ້ມູນກ່ຽວກັບຫໍພິພິທະພັນ, ອາຄານຕ້ອນຮັບ, ອາຄານວາງສະແດງງານສິລະປະ-ວັດທະນະທໍາຕາມເທສະການຕ່າງໆ, ຫ້ອງໂຖງພັກຜ່ອນຊົມທິວທັດ, ອາຄານອະເນກປະສົງ, ອາຄານສະແດງງານສິລະປະໄມ້ແກະສະຫລັກ ແລະ ຮູບແຕ້ມ, ຮ້ານຂາຍເຄື່ອງທີ່ລະນຶກ, ໂຮງແຮມ, ລີສອດ, ອາຄານວາງສະແດງສິນຄ້າ, ຮ້ານອາຫານ, ເຄື່ອງດື່ມ, ນໍ້າຕົກຈໍາລອງ ແລະ ອື່ນໆ.
ທີ່ມາຂອງຂ່າວ: https://www.facebook.com/profile.php?id=100064329476403